“სემეკი” ამბობს, რომ ახალციხეში დაბინძურებული წყლის ხარისხს, სურსათის უვნებლობის სააგენტოსთან ერთად სწავლობს, – ამის შესახებ “ენერგეტიკისა და წყალმომარაგების მარეგულირებელ ეროვნულ კომისიაში” გვეუბნებიან.

“იქიდან გამომდინარე, რომ სემეკს არ აქვს ლაბორატორია, დამოუკიდებლად ვერ მოახდენს წყლის ხარისხის შემოწმებას. თუმცა, ჩვენის მხრივ დავუკავშირდით სურსათის უვნებლობის სააგენტოს და მათ მიერ მოხდება სასმელი წყლის ხარისხის შემოწმება. აღნიშნულის შემდეგ გადაიდგმება სხვა ქმედითი ნაბიჯები,” – გვეუბნებიან უწყებაში.

ახალციხეში მოსახლეობას ერთ კვირაზე მეტია დაბინძურებული სასმელი წყალი მიეწოდებათ, როგორც ადგილობრივები გვეუბნებიან წყალს მატლები, მიწა და სხვა ნარჩენები მოჰყვებოდა.

გაერთიანებული წყალმომარაგების კომპანიაში გვითხრეს, რომ დაბინძურება უამინდობის გამო სათავე ნაგებობის ამღვრევამ გამოიწვია და მიმდინარეობს სარეაბილიტაციო სამუშაოები.

გუშინ , 1-ელ აპრილს კომპანიამ აბონენტებს შეტყობინება გაუგზავნა, რომლის მიხედვითაც წყალმომარაგება 00:00 საათზე უნდა აღდგენილიყო. თუმცა, ამავე წყაროს ცნობით წყლის მიწოდებამ 20:00 საათამდე გადაიწია.