ავტორი: მიშო დარბაიძე – 577681889
- “დავების საბჭოში” ახალციხის მერიამ დავა წააგო
- კინოკლუბის შენობის დანგრევის ტენდერში მონაწილეობა ორმა კომპანიამ მიიღო
- ყველაზე მცირე თანხის მქონე კომპანიას დისკვალიფიკაცია მიენიჭა, გასაჩივრების შემდეგ “დავების საბჭომ” საჩივარი დააკმაყოფილა
- ტენდერში მონაწილე მეორე კომპანია “ქართული ოცნების” შემწირველია
- მერიას დაევალა, მათ მიერვე დისკვალიფიცირებული, მომჩივანი კომპანიის მიერ წარდგენილი დოკუმენტაციის განხილვა
ვრცლად ნახეთ სიუჟეტი
ტექსტი:
“სახელმწიფო შესყიდვების დავების საბჭოში” ახალციხის მერიამ დავა წააგო. მერიას დაევალა, მათ მიერვე დისკვალიფიცირებული, მომჩივანი კომპანიის მიერ წარდგენილი დოკუმენტაციის განხილვა.
რა მოხდა? – დავიწყოთ თავიდან.
ახალციხის მერიამ, რუსთაველის 124-ში არსებული კინო კლუბის შენობის დემონტაჟზე ტენდერი 2025 წლის 8 იანვარს გამოაცხადა. გეგმაშია მისი დანგრევა და მის ნაცვლად, იგივე დანიშნულების ახალი შენობის აშენება.
წინადადებების მიღება 17-20 იანვრის პერიოდში მიმდინარეობდა. სახელმწიფო შესყიდვების სააგენტოს ვებ გვერდზე არსებული ინფორმაციის მიხედვით, კონკურსში მონაწილეობა ორმა კომპანიამ მიიღო.
შპს “გიკო”-მ მერიას სამუშაოების შესრულებისთვის 47 975 შესთავაზა, ხოლო შპს “ბესტჰაუსი 2024” -მა – 44 000 ლარი. (შპს “გიკო” “ქართული ოცნების” შემწირველია, ამაზე ოდნავ ქვემოთ)
სახელმწიფო შესყიდვისას, უწყება შეთავაზებული ყველაზე დაბალი ფასის მქონე კომპანიის დოკუმენტაციას განიხილავს, თუმცა 29 იანვარს ახალციხის მერიის სატენდერო კომისიის სხდომაზე, რომლის ხელმძღვანელიც ახალციხის მერი, ირაკლი ლაზარაშვილია, ყველაზე დაბალი ფასის მქონე კომპანიას დისკვალიფიკაცია მიანიჭეს, ტექნიკური დოკუმენტაციის, კერძოდ გამოცდილების დამადასტურებელი დოკუმენტაციის შეუსაბამობის გამო.
დავების განხილვის საბჭოში შპს “ბესტჰაუს 2024”-ის საჩივარი 31 იანვარს შევიდა. კომპანია საჩივარში მიუთითებდა, რომ მისი დისკვალიფიკაცია უსაფუძვლო იყო, ახალციხის მერიის სატენდერო კომისიის გადაწყვეტილების გაუქმებას და მისი დოკუმენტაციის განხილვას ითხოვდა.
“სამუშაოს გამოცდილების დამადასტურებელი დოკუმენტების შეფასებისას, უნდა წარმოადგენდეს პრეტენდენტის მიერ წარმოდგენილ ხელშეკრულებასა და ამ ხელშეკრულებით გათვალისწინებული ღირებულების ნაწილში შესრულებული სამუშაოების ურთიერთკავშირის დადგენა და არა პრეტენდენტის გამიზნული დისკვალიფიკაცია შესყიდვების პროცედურიდან,” – წერია მოთხოვნაში.
დავების საბჭომ საჩივარი 17 თებერვალს დააკმაყოფილა და მერიას დაევალა შპს “ბესტჰაუსის” მიერ დაზუსტებული ტექნიკური დოკუმენტაციის შერჩევა-შეფასება.
ამ ეტაპზე მიმდინარეობს შერჩევა-შეფასების პროცესი.
შპს “ბესტჰაუსში” ჩვენთან კომენტარს არ აკეთებენ. მიზეზების შესახებ ინფორმაციის მიღებას ველოდებით ახალციხის მერიისგან.
კომპანიების შესახებ:
შპს “ბესტჰაუსი 2024”
შპს “ბესტჰაუსი 2024” გასული წლის, 23 აპრილს დარეგისტრირდა, მისი დირექტორი და 100 % იანი წილის მფლობელი ნინო ქაშიაშვილია.
მას პარტიული შეწირულობა არ უფიქსირდება.
შპს “გიკო”
შპს “გიკო” ბაზარზე 2011 წლიდან ჩნდება, მისი 100 % იანი წილის მფლობელი, პაატა ფოცხვერაშვილია.
პაატა ფოცხვერაშვილმა, 2021 წლის აგვისტოში “ქართულ ოცნებას” 10 000 ლარი შესწირა.
ჩვენ ფოცხვერაშვილს დავუკავშირდით, მან ჩვენს კითხვებს არ უპასუხა და გვიხრა, რომ დირექტორმა არ უნდა იცოდეს თუ რა ტენდერებში იღებს მონაწილეობას კომპანია და არც არასდროს დაინტერესებულა ამით..
კინო კლუბი
რაც შეეხება კინოკლუბის შენობას, ტენდერის მიხედვით, გამარჯვებულ კომპანიას ევალება შენობის დემონტაჟი, ნარჩენების გატანა და ვარგისი მასალების დასაწყობება.
ეს სწორედ ის შენობაა, რომლის რეაბილიტაციისთვის 2021 წელს ,ახალციხის მერიამ 1,5 მილიონამდე ლარზე მეტი, სხვადასხვა დროს “ქართული ოცნების” და “ნაციონალური მოძრაობის” შემწირველ კომპანიას ხელშეკრულება გაუფორმა.
სატენდერო დოკუმენტების მიხედვით, ჯამში მერიამ კომპანიას ავანსის და შესრულებული სამუშაოებისთვის 160 000-ზე მეტი ლარი გადაუხადა. თუმცა სამუშაოები არ გაგრძელდა და ხელშეკრულება შეწყდა.
“სახელმწიფო აუდიტის სამსახურის” დასკვნაში წერია, რომ სამუშაოების მიმდინარეობისას კედლებზე გამოიკვეთა ბზარები, ექსპერტების დასკვნის მიხედვით კი ობიექტს ესაჭიროებოდა გამაგრებითი სამუშაოების ჩატარება.
სახელმწიფო აუდიტის დასკვნაშივეა მითითებული, რომ მუნიციპალიტეტმა ხარჯების სიდიდიდან გამომდინარე, შენობის დემონტაჟი გადაწყვიტა.
აუდიტის დასკვნაშივე ვკითხულობთ, რომ მერიას შენობის რეაბილიტაციის საპროექტო დოკუმენტაცია 14 000 ლარად ჰქონდა ნაყიდი.
ჩვენ ახალციხის მერიიდან ველოდებით ინფორმაციის მიღებას თუ რამდენად გაითვალისწინა ახალციხის მერიამ აუდიტის დასკვნებში ასახული რეკომენდაციები, მათ შორის საპროექტო-სახარჯთაღრიცხვო დოკუმენტაციის მიღება-ჩაბარების წესის შემუშავების და განსაზღვრის მიმართულებით.
მას შემდეგ, რაც კინო კლუბის შენობას დაანგრევენ, ახალციხის მერია 5 მილიონამდე ლარად ახალი შენობის აშენებას გეგმავს. იმისთანებისთვის გამოცხადებული ტენდერი შერჩევა/შეფასების პროცესშია.