ახალქალაქში ქუჩების საახალწლო დეკორაციებით მოწყობისა და გასართობი ღონისძიებებისთვის გამოცხადებული ტენდერი მეორედ არ შედგა. მუნიციპალიტეტის მერია აღნიშნულისთვის 40 000 ლარის გამოყოფას გეგმავდა.

თავდაპირველად ტენდერში მხოლოდ ერთი პრეტედენტი მონაწილეობდა, თუმცა მას დისკვალიფიკაცია მიენიჭა. მეორედ გამოცხადებული, იდენტური ტენდერით არავინ დაინტერესებულა. 

ახალქალაქის მერი, მელქონ მაკარიანი გვეუბნება, რომ ტენდერს კიდევ ერთხელ “აუცილებლად” გამოაცხადებენ, იგივე პირობებით. 

რაც შეეხება სხვა მუნიციპალიტეტებს. საახალწლო აქსესუარებისთვის და ლედ დეკორაციისთვის ასპინძის მერიამ ტენდერი 11 321 ლარზე გამოაცხადა. მასში მონაწილეობა შპს “ქოლორფულ სფირითს”-მა მიიღო და ხელშეკრულებაც დაიდო. კომპანიამ სამუშაოები 15 დეკემბრამდე უნდა განახორციელოს. 

სამცხე-ჯავახეთის სხვა მუნიციპალიტეტებში ამ მიმართულებით ტენდერები ჯერ არ გამოცხადებულა.