რა პრობლემების მოგვარება სურთ ახალციხის სოფლებში მცხოვრებლებს და რამდენი ლარი გამოიყო “სოფლის მხარდაჭერის პროგრამის” ფარგლებში თითოეული სოფლისთვის

ნახეთ სიუჟეტი

ტექსტი:

სასაფლაომდე მისასვლელი და შიდა გზების, სასმელი და სარწყავი სისტემის რეაბილიტაცია და სანიაღვრე არხების მოწყობა – რა პრობლემების მოგვარება სურთ ახალციხის მუნიციპალიტეტის სოფლებში, ბიუჯეტიდან მათთვის გამოყოფილი თანხით.

ახალციხის მუნიციპალიტეტში, სოფლის მხარდაჭერის პროგრამის ფარგლებში მოსახლეობასთან შეხვედრები დასრულდა, პრიორიტეტების დოკუმენტი შეიმუშავეს და საკრებულოს დეპუტატებმა, კითხვების და მოსაზრებების გამოთქმის გარეშე, ერთპიროვნულად მხარი დაუჭირეს. 

ახალციხის მერის მოადგილის, ილია ზარდიაშვილის თქმით, სახელმწიფო ბიუჯეტიდან გამოყოფილ 612 000 ლარს, ადგილობრივი ბიუჯეტიდან 918 000 ლარი დაემატა და სოფლებზე, განსახორციელებელი სამუშოების შესაბამისად გადანაწილდა. 

პრიორიტეტების დოკუმენტის მიხედვით:
მუნიციპალიტეტის სოფლების თითქმის ნახევარში, შიდა გზების მოწესრიგებას დაუჭირეს მხარი;
7 სოფელში სასმელი და სარწყავი სისტემის რეაბილიტაცია ისურვეს;
6 სოფელში სასაფლაოსთან მისასვლელი გზის რეაბილიტაცია სურთ;
3 სოფელში სანიაღვრე არხების მოწყობა;
1 სოფელში საბავშვო ატრაქციონების;
3 სოფელში გარე განათების;
3 სოფელში სპორტული ტრენაჟორების მოწყობა;
1 სოფელში სასაფლაოს შემოღობვა. 

ახალციხის მერიამ, პროგრამის ფარგლებში მოსახლეობასთან შეხვედრები 6-24 თებერვალს აწარმოა. ამ ეტაპზე არსებული ინფორმაციით, ბიუჯეტიდან ჯამში 1 530 000 ლარის გამოყოფა იგეგმება.