ავტორი: მიშო დარბაიძე – 577681889

რა ხდება გურიაში და აჭარაში? – ირაკლი კობახიძე კითხვებს თავს არიდებს

ნახეთ სიუჟეტი

ტექსტი:

ირაკლი კობახიძე დასავლეთ საქართველოში, დიდთოვლობის გამო წარმოქმნილ პრობლემებზე შეკითხვებს თავს არიდებს. 

მიუხედავად იმისა, რომ სახელმწიფო სტრუქტურა, გარემოს ეროვნული სააგენტო ჯერ კიდევ 18 თებერვალს გვაფრთხილებდა მოსალოდნელი დიდთოვლობის და უამინდობის შესახებ, მოქალაქეები ამბობენ, რომ სახელმწიფო უამინდობას მომზადებული არ შეხვდა და დიდთოვლობა სტიქიად გადაიქცა.

გურიის და აჭარის მაღალმთიანი სოფლების ნაწილი გარე სამყაროს არის მოწყვეტილი. როგორც ტელეკომპანია გურიის ჟურნალისტი, ნინო ვაშალომიძე გვეუბნება, მაღალმთიან სოფლებში თოვლის საფარის სიმაღლე დაახლოებით 2 მეტრია, ხოლო ქალაქში – 1 მეტრზე მეტი. 

ამავე ტელეკომპანიამ გაავრცელა ინფორმაცია, რომ გურიის სოფელ კონჭკათში დიდთოვლობის შედეგად ერთი პირი დაიღუპა. 

გავრცელებული ინფორმაციის მიხედვით, პირი მაშინ დაიღუპა, როდესაც მეზობლის სახლის სახურავის გადათოვლას ცდილობდა. 

დღეს, აჭარა თაიმსმა, კიდევე ერთი გარდაცვლილის შესახებ გაავრცელა ინფორმაცია. მედიის ცნობით, გაყინული კაცი, ქობულეთში სახლთან ახლოს იპოვეს, ამ ეტაპზე გარდაცვალების მიზეზი უცნობია. 

სოციალურ ქსელებში ვრცელდება არაერთი ფოტო და ვიდეო, რომლებზეც ჩანს, რომ ადგილობრივები თოვლის გამო სახლებს ვერ ტოვებენ, შეზღუდულია გადაადგილება, სოფლებში არ არის ელექტრო ენერგია, არც გაზი. ხოლო რამდენიმე სახლი ჩამოინგრა. მოქალაქეები დახმარებას ხელისუფლებას სთხოვენ. 

რა მოიმოქმედა სახელმწიფომ? – დიდთოვლობის დაწყებიდან მეექვსე დღეს, “ქართული ოცნებაში” თქვეს, რომ დაზარალებული მოსახლეობის დახმარების პროცესში თავდაცვის ძალები ჩაერთვებიან. 

სახელმწიფოს რეაგირებების ფონზე, დაზარალებულების დასახმარებლად მოქალაქეები ერთიანდებიან. სოციალურ ქსელში შეიქმნა ჯგუფი “მოხალისეები გურიისთვის”. მოხალისეთა ნაწილი გურიაში დაზარალებულების დასახმარებლად მიდიან, მათ შორის ახალციხიდანაც.

როგორია სახელმწიფოს როლი მსგავსი უამინდობის დროს, იმის გათვალისწინებით, რომ ამინდის გაუარესების შესახებ იგივე სახელმწიფო ინსტიტუტები ავრცელებდნენ ინფორმაციას? – გვესაუბრება აგროგარემო TV-ს დირექტორი, ნუგზარ სუარიძე. 

გარემოს ეროვნული სააგენტოს მიერ გავრცელებული განცხადების მიხედვით, საქართველოს რეგიონებში თოვა კიდევ 3 დღე გაგრძელდება. ჩვენ გვინდოდა უწყებიდან დამატებითი ინფორმაციის მიღება, თუმცა აქ ჩვენს ზარებს არ პასუხობენ.

დასავლეთ საქართველოში, კერძოდ კი გურიასა და აჭარაში ძლიერი თოვა 20 თებერვალს დაიწყო. მას შემდეგ სტიქიის ზონაში, მაღალმთიან სოფლებში ელექტრო ენერგიის და ბუნებრივი აირის მიწოდება შეწყვეტილია. 

რამდენ აბონენტს აქვს შეზღუდული ელექტრო ენერგიის მიწოდება? – კითხვებით  “ენერგო პრო ჯორჯიას” დავუკავშირდით, მათ საჯაროდ გავრცელებული ინფორმაცია მოგვაწოდეს, რომლის მიხედვითაც, ელექტროენერგია შეზღუდვით, დასავლეთ საქართველოს 8 %-ს არ მიეწოდება. 

სოკარგაზკომპანიაში გვეუბნებიან, რომ ბუნებრივი აირის მიწოდების შეზღუდვა რამდენიმე უბანზეა, კონკრეტულად რამდენ აბონენტს არ მიეწოდება ბუნებრივი აირი, კომპანიიდან ინფორმაციის მიღებას ველოდებით. 

ამავე წყაროს ინფორმაციით, სამუშაოები მიმდინარეობს უწყვეტ რეჟიმში, რათა გაზის მიწოდება აღდგეს.

დიდთოვლობის გამო, 23 თებერვლიდან შეწყვეტილია დასავლეთ საქართველოსკენ მიმავალი და მომავალი მატარებლის რეისებიც, “საქართველოს რკინიგზის” მიერ გავრცელებული ინფორმაციით, ვინც ამ პერიოდში ბილეთები შეიძინა თანხას უკან დაუბრუნებენ.