ავტორი: მიშო დარბაიძე — 577681889
უკანონო თევზჭერის 292 ფაქტი საქართველოში, მათ შორის 12 სამცხე-ჯავახეთში, ყველა მდინარე მტკვარზე – გარემოსდაცვითი ზედამხედველობის დეპარტამენტი უკანონო თევზჭერის მონიტორინგის 9 თვიან შედეგებს აქვეყნებს.
ანგარიშის მიხედვით, გამოვლენილი დარღვევიდან 131 სისხლის სამართლის დანაშაულის ნიშნებს შეიცავს.
უწყებაში გვითხრეს, რომ სამცხე-ჯავახეთში 12 გამოვლენილი ფაქტიდან 10 ადმინისტრაციული ხოლო 2 სისხლის სამართლის დანაშაულის ნიშნების შემცველია.
“სამცხე-ჯავახეთში გამოვლენილი დარღვევებიდან ყველა მდინარე მტკვარის ტერიტორიაზეა აღმოჩენილი. ყველა უკანონოდ თევზს ბადის საშუალებით იჭერდა,” – გვეუბნებიან საზოგადოებასთან ურთიერთობის სამსახურში.
უწყებაში გვითხრეს, რომ ინფორმაცია შსს-ში იგზავნება და დანარჩენ რეაგირებას ისინი ახდენენ.
შედეგების მიხედვით, ყველაზე მეტი უკანონო თევზჭერის ფაქტი თბილისში გამოვლინდა აქ 38 შემთხვევა დააფიქსირეს.
დეპარტამენტმა ჯამში 3 800 სახლართი ბადე და 280 კილოზე მეტი თევზი ამოიღეს.
ასევე გამოვლინდა ელექტროშოკური აპარატის გამოყენების 63 ფაქტი და ბადის გამოყენების 153 ფაქტი.