ახალციხეში, “დემოკრატ მესხთა კავშირის” ოფისში, ევროკავშირის საინფორმაციო პუნქტი გაიხსნა. პუნქტი დღეს, ევროკავშირის ელჩმა, პაველ ჰერჩინსკიმ ოფიციალურად გახსნა, – ინფორმაციას საქართველოში ევროკავშირის წარმომადგენლობა ავრცელებს.
„მინდა კვლავ დავადასტურო ევროკავშირის ერთგულება საქართველოს ყველა რეგიონში სამოქალაქო საზოგადოების ინიციატივების გაძლიერების მიმართ,” — განაცხადა ელჩმა, სამცხე-ჯავახეთის მედიებთან და სამოქალაქო ორგანიზაციებთან შეხვედრისას.
გავრცელებული ინფორმაციის მიხედვით, “საინფორმაციო პუნქტი წარმოადგენს პლატფორმას ადგილობრივი სამოქალაქო საზოგადოებისთვის, ახალგაზრდობისა და მედიისთვის, რომელიც ხელს შეუწყობს ევროკავშირთან დაკავშირებულ თემებზე ადგილობრივების ჩართულობის გაზრდას, სანდო ინფორმაციის მიღებას და სამოქალაქო ცხოვრებაში აქტიურ მონაწილეობას.”
ევროკავშირის ელჩი 2 დღიანი ვიზიტით ახალციხეს სტუმრობს. გავრცელებული ინფორმაციის მიხედვით, ელჩი ხვდება ევროკავშირის მიერ მხარდაჭერილ ადგილობრივ ბენეფიციარებს, სამოქალაქო საზოგადოებას, ახალგაზრდებსა და ეთნიკური უმცირესობების წარმომადგენლებს.