სხვილისში  ახალციხის მუნიციპალიტეტის სოფელ სხვილისში მინი საფეხბურთო მოედნის მშენებლობა და სასმელი წყლის სისტემის რეაბილიტაცია იგეგმება. სტადიონისთვის მერია 80 ათას ლარზე მეტის გამოყოფას გეგმავს, ხოლო წყლის სისტემისთვის – 50 ათას ლარამდე თანხის. 

დოკუმენტის მიხედვით, კომპანიამ, რომელიც მინი მოედნის მშენებლობას დაიწყებს, ხელშეკრულების დადებიდან 12 კვირის ვადაში უნდა მოაწყოს 450 კვ.მ სიდიდის სპორტული მოედანი და აღჭურვოს შესაბამისი ინვენტარით (ფეხბურთის და კალათბურთის კარები და გარე განათება) – თანხა “სოფლის მხარდაჭერის პროგრამის ფარგლებში” გამოიყოფა. 

რაც შეეხება სასმელი წყლის რეაბილიტაციას, დოკუმენტის მიხედვით, აქ საჭიროა არსებული წყლის ჭის დემონტაჟი და მის ადგილზე ახალი ჭის აშენება. ასევე, იგეგმება დაზიანებული მილსადენის შეცვლა, სალექარის მოწყობა და ფილტრების შეცვლა.

მუნიციპალიტეტის მერიაში გვეუბნებიან, რომ პროექტების განხორციელების შესახებ გადაწყვეტილება, მოსახლეობის მოთხოვნიდან გამომდინარე მიიღეს. წყლის სისტემის რეაბილიტაციის ტენდერზე წინადადებების მიღება 30 სექტემბრიდან 03 ოქტომბრამდე იწარმოებს, ხოლო მოედნისთვის – 07-10 ოქტომბრამდე.