TOK TV-ს პასუხი ახალციხის მერს
ტექსტი:
მაშინ, როდესაც ჩვენ საქმიანობას ახალციხის მერი, ირაკლი ლაზარაშვილი “მავნებლობას” და “ჭორაობას” უწოდებს, ჩვენ გადავწყვიტეთ გაგიზიაროთ თქვენსავე მომართვის და ჩვენს მიერ დაფიქსირებული პრობლემების საფუძველზე მომზადებული რეპორტაჟების ნაწილი.
ფსიქოტროპული მედიკამენტები
2021 წელს, სამცხე-ჯავახეთში ფსიქოტროპული მედიკამენტები, თვეების განმავლობაში ბენეფიციარებზე არ გაიცემოდა. რეგიონში 500-ზე მეტი ბენეფიციარისთვის შეწყვეტილი მომსახურების მიზეზი რეგიონში ლიცენზირებული ფარმაცევტის არ არსებობა იყო.
ჩვენი რედაქცია თვეების განმავლობაში ესაუბრებოდა მედიკამენტების საჭიროების მქონე ოჯახებს და პასუხისმგებელ პირებს, უწყვეტი გაშუქების შედეგად, არაერთი სამთავრობო უწყებისთვის მიმართვის შედეგად სამცხე-ჯავახეთში ფსიქოტროპული მედიკამენტების მიწოდება აღდგა.
სამცხე-ჯავახეთში ფსიქოტროპული წამლების გაცემა შესაძლოა ხვალ განახლდეს
ტაბიძის ქუჩის საავტომობილო გზა
2023 წელი, ახალციხეში, ტაბიძის ქუჩაზე დაზიანებული საავტომობილო გზა, რომლის რეაბილიტაციასაც ხალხი 7 წელი ითხოვდა, ჩვენი ინტენსიური გაშუქების და პრობლემის დღის წესრიგიდან არ მოხსნის შედეგად დაიგო. მერიას ტაბიძის და ბაგინაშვილის ქუჩებზე გზის დაგება 300 000-ზე მეტი ლარი დაუჯდა.
ტაბიძის ქუჩის გზის რეაბილიტაციის 5+1 წლიანი დაპირება
საჯარო სკოლა სოფელ კოხტაში
წალკის სოფელ კოხტაში თანამედროვე სტანდარტებით აღჭურვილი სკოლა ევროკავშირმა რომ ააშენა და აკრედიტაციის მიუხედავად საგანმანათლებლო დაწესებულება მოსწავლეებს რომ ვერ იღებდა ჩვენგან შეიტყვეთ.
წალკაში, სოფელ კოხტაში ახალაშენებულ სკოლაში შესაძლოა მოსწავლეებმა სწავლა წელსვე შეძლონ
ჩვენი ჩართულობით და მოქალაქეების მიერ მკაფიოდ გამოხატული კრიტიკული პოზიციის შედეგად, წალკის პირველი საჯარო სკოლიდან, კოხტას სკოლაში მოსწავლეთა მობილობა დაიწყო. ბავშვები სოფელშივე მდებარე სკოლის ნაცვლად კილომეტრებს აღარ გადიან სხვა სკოლაში მისასვლელად.
სოფელ კოხტას ახალ სკოლაში სასწავლო პროცესი დაიწყო
საგზაო სარკეები
ახალციხეში, რამდენიმე ქუჩაზე, კერძოდ რაბათის ტერიტორიაზე, ახალციხე-ვალე-ადიგენის გზაგასაყარზე და მარდის დასახლებაში გატეხილი, დაბურული და დაზიანებული საგზაო სარკეები ახალციხის მერიამ ჩვენს მიერ მომზადებული რეპორტაჟიდან დაახლოებით 2 კვირაში შეაკეთა.
ახალციხეში საგზაო საორიენტაციო სარკეები შეაკეთეს
კიბეები
ეს დაზიანებული კიბეებიც მას შემდეგ მოაწესრიგეს, რაც საკითხით ჩვენ დავინტერესდით. პრობლემა მასალის მომზადებიდან, ერთ კვირაში მოგვარდა.
კიბეები, რომლის საშუალებითაც, ახალციხეში, მეორე საჯარო სკოლასთან მოხვდებით მოაწესრიგეს
პირველი “ზებრა” წალკაში
წალკის მუნიციპალიტეტის ტერიტორიაზე ე.წ ზებრა-ქვეითთა გადასასვლელი პირველად ისტორიაში სწორედ ჩვენი მუშაობის შედეგად დაიხაზა.
წალკაში პირველი ე.წ. ზებრა გადასასვლელი დახაზეს
ზებრა გადასასვლელი ახალციხეში
ალბათ, ასპინძის ქუჩაზე ეს ზებრა გადასასვლელიც გახსოვთ, რომელიც ისეთ ადგილზე იყო დახაზული, რომ პირდაპირ ხესთან მიგიყვანდათ.
მერიამ ვიდეოს მომზადებიდან მეორე დღესვე ბალახის გაზონი გაჭრა და ქვის ფილები დააგო.
ჩვენი მედიით შეიტყვეთ წალკაში, კულტურული მემკვიდრეობის უნიკალურ, მსოფლიო მასშტაბის ძეგლების შესახებ, რომელთა დიდ ნაწილსაც კულტურული მემკვიდრეობის ძეგლის სტატუსი ამ დრომდე არ აქვს და რომლებიც ნადგურდება: პეტროგლიფები იშლება, მენჰირები იქცევა, ყორღნები იძარცვება, პირველი იარაღის საწარმო ინგრევა და აღმოჩენილ დარანებს ისევ მიწა გადააყარეს.
დარანი
ჩვენ მოგიყევით ახალქალაქში აღმოჩენილი დარანის შესახებაც, რომელიც მაშინ გამოჩნდა, როდესაც იხტილა-სამსრის საავტომობილო გზა გაიყვანეს. ჩვენვე მოგიყევით იმის შესახებ, რომ ამ ისტორიული ძეგლის შესწავლას კულტურული მემკვიდრეობების დაცვის სააგენტო არ აპირებს.
ახალქალაქში აღმოჩენილი დარნის კვლევას კულტ. სააგენტო არ აპირებს
პურის საცხობი
TOK TV-ს მიერ მომზადებული სიუჟეტით შეიტყო ახალციხელებმა, ახალგაზრდა გიორგი ვარდიძის ბიზნესის, ახალი პურის საცხობის შესახებ, სადაც მესხურ ტრადიციულ საფუარზე დამზადებული მესხური პურის რამდენიმე სახეობის დაგემოვნება შეგიძლიათ.
მარო ბებო
ჩვენვე მოგიყევით, მუსხში მცხოვრები მარო ბებოს შესახებ, რომელიც წლებია მესხური ტრადიციული ორნამენტების გამოყენებით ხალიჩებს, ფარდაგებს, წინდებს და სხვა ნივთებს ქსოვს და ახალგაზრდებს ასწავლის.
_____
წლებია ჩვენი გუნდი იღებს თქვენს შეტყობინებებს, აკვირდება თავად გარემოს და ცდილობს იყოს თემთან ახლოს. ყოველ დილით ვგეგმავთ და ვმუშაობთ პანდემიის დროსაც, უამინდობის და უძლურობის დროსაც. თავად განსაჯეთ, ამას “ჭორაობა” ჰქვია თუ საკუთარი საქმის ერთგულება საკუთარი თემისთვის.