ახალციხეში, ზარზმელის ქუჩაზე, საბავშვო მინი სტადიონის მიმდებარედ, რამდენიმე დღის განმავლობაში დაზიანებული საკანალიზაციო ლუქიდან ფეკალური მასები და წყალი ამოდიოდა. ერთ-ერთმა ადგილობრივმა ჩვენს რედაქციას საკითხში ჩართვა და პრობლემის მოგვარება სთხოვა.
ეს კადრები ჩვენმა რედაქციამ გუშინ გადაიღო. პრობლემის მიზეზების შესახებ გაერთიანებული წყალმომარაგების კომპანიის პრესსამსახურს დავუკავშირდით. კომპანიაში გვითხრეს, რომ ცხელ ხაზზე ზარზმელის ქუჩის დაზიანების თაობაზე შეტყობინება არ მიუღიათ, შესაბამისად ვერ ჰქონდათ რეაგირება.
ჩვენი რედაქციის ჩართულობის შემდეგ, საბავშვო მინი სტადიონის მიმდებარედ დაზიანებული საკანალიზაციო კვანძი მოწესრიგდა. ჩვენ შედეგი ადგილზე დღეს გადავამოწმეთ და ახლა ეკრანზე სწორედ დღეს გადაღებულ კადრებს ხედავთ.