“ალბათ ტექნოლოგიურად ხდება შემოწმება” – გვეუბნება ახალციხის მერი, ირაკლი ლაზარაშვილი საარჩევნო ცვლილებებთან დაკავშირებით, რომელიც დამკვირვებელს უზღუდავს ამომრჩევლის პირადობის დამადასტურებელი დოკუმენტის ჩვენების მოთხოვნას, მათ შორის გამორთმევას და ფოტოს გადაღებას.
“სამართლიანი არჩევნების” მიერ გავრცელებული განცხადების მიხედვით, 3 აპრილს, “ცესკოს” მიერ საარჩევნო კოდექსში შეტანილი ცვლილებები არსებითად ზღუდავს საარჩევნო პროცესის ეფექტიანად დაკვირვების შესაძლებლობას მით უფრო, როდესაც საქართველოში საპარლამენტო არჩევნებზე გამოვლინდა არაერთი დარღვევა: არასათანადო დოკუმენტით ხმის მიცემა, სხვის ნაცვლად ან/და მრავალჯერადი ხმის მიცემა.
ცვლილებები ზღუდავს:
- ამომრჩევლის პირადობის დამადასტურებელი დოკუმენტის ჩვენების მოთხოვნას, მათ შორის, გამორთმევას;
- ამომრჩევლის პირადობის დამადასტურებელი დოკუმენტის, ამომრჩეველთა ვერიფიკაციის აპარატზე გამოტანილი ამომრჩევლის მონაცემების, ამომრჩეველთა ვერიფიკაციის აპარატიდან ამობეჭდილი ამომრჩევლის ვერიფიკაციის დამადასტურებელი ქვითრისა და ამომრჩევლის მიერ საარჩევნო ბიულეტენზე გაკეთებული არჩევანის ფოტოვიდეოგადაღებას ან სხვაგვარი დამუშავებას;
- კენჭისყრის ოთახში ამომრჩევლის გადაადგილების ფიზიკურად შეფერხებას.
