გარდაბნის მუნიციპალიტეტში, უკვე ათობით წელია მოსახლეობას დაზიანებული და მოუვლელი ლიფტების პრობლემა აწუხებს. როგორც, აქ მცხოვრებლები ამბობენ, ძველ ლიფტებს ხშირად უზიანდება კარი და მოსახლეობა იჭედება. გვეუბნებიან, რომ გარდაბანში ხელოსანი არ ჰყავთ და რუსთავიდან უწევს ჩამოსვლა.
აქვს თუ არა ინფორმაცია პრობლემის შესახებ გარდაბნის მუნიციპალიტეტის მერიას და აპირებენ თუ არა დაზიანებული ლიფტების შეცვლას? – კითხვებით მუნიციპალურ ორგანოს დავუკავშირდით, თუმცა აქ ინფორმაციის საჯარო წესით გამოთხოვისკენ მოგვიწოდეს. ჩვენმა რედაქციამ საჯარო ინფორმაცია უკვე გამოითხოვა.
გარდაბნის მუნიციპალიტეტის 2023 წლის ბიუჯეტის მიხედვით, საცხოვრებელი და არასაცხოვრებელი შენობების მოვლა-პატრონობისთვის მიმდინარე წელს 300 ათასამდე ლარის დახარჯვა იგეგმება. პროგრამის ფარგლებში გათვალისწინებულია ლიფტების რემონტი და სათადარიგო ნაწილების შეცვლა. ამავე დოკუმენტის მიხედვით, მუნიციპალიტეტში 18 ლიფტია.