“სახელმწიფო აუდიტის სამსახური” ახალციხის მერიის გამარტივებულ შესყიდვებში, თანხების ზედმეტად ანაზღაურების რისკს ხედავს, – ამის შესახებ საუბარია “აუდიტის” ბოლო დასკვნაში.

დასკვნა აუდიტმა 2 თებერვალს გამოაქვეყნა და მოიცავს მუნიციპალიტეტის 2021-22 წლების სამუშაოების შეფასებას.

“აუდიტის” მიხედვით, საანგარიშო პერიოდში, ახალციხის მუნიციპალიტეტმა გამარტივებული შესყიდვის საშუალებით, 3 ხელშეკრულებით, 130 000-ზე მეტ ლარად შეისყიდა სამშენებლო სამუშაოები, რომლის თანხაც მერიამ ისე გადაიხადა, რომ ფაქტობრივი დანახარჯები არ დაუდასტურებია.

“აუდიტის ჯგუფმა მოითხოვა ფაქტობრივი ხარჯის ამსახველი დოკუმენტაცია, თუმცა მერიამ შესაბამისი მონაცემები ვერ წარმოადგინა,” – ნათქვამია ანგარიშში.

რა პოზიცია აქვს აღნიშნულთან დაკავშირებით ახალციხის მერიას? – უწყებაში გვითხრეს, რომ წერილობით უნდა მიგვემართა. ჩვენ მერიას საჯარო ინფორმაციის მიღების მიზნით უკვე მივმართეთ.

მეოთხე დღეა მერიიდან პასუხის მიღებას ველოდებით აუდიტის მიერ ეჭვქვეშ დაყენებული საწვავის ხარჯვის მიზნობრიობის და უხარისხო საპროექტო-სახარჯთაღრიცხვო დოკუმენტების შესახებ.

მასალები ვრცლად:

ახალციხის მერიამ 74 ხელშეკრულებაში 150-ზე მეტი ცვლილება შეიტანა – აუდიტი

–

რამდენს წვავს ახალციხე? – აუდიტის დასკვნა

“აუდიტში” გვეუბნებიან, რომ ახალციხის, ნინოწმინდის, ახალქალაქის და ბორჯომის საქმიანობის ანგარიშები პროკურატურაში გადაგზავნეს.

დაიწყო თუ არა გამოძიება ამ ეტაპზე უცნობია, პროკურატურაში ინფორმაციის დაზუსტებას დაგვპირდნენ.