ბორჯომის მუნიციპალიტეტის მერია 2022 წელს საგზაო ინფრასტრუქტურისთვის, წყლის სისტემის მოწესრიგებისთვის, გარე განათებისთვის, მშენებლობა-რეაბილიტაციისთვის, მუნიციპალური ტრანსპორტის სუბსიდირებისთვის და ქუჩების დასუფთავებისთვის მიმდინარე წელს 10 მილიონ ლარამდე გამოყოფას გეგმავს, — აღნიშნული ხარჯები ასახულია 2022 წლის ბიუჯეტში.
თანხა წინა წელთან შედარებით, 8 მილიონ 500 ათასზე მეტითაა შემცირებული, როგორც მერი, ოთარ არბოლაშვილი გვეუბნება თანხას შემდგომში დაემატება რეგიონალური განვითარების ფონდიდან 3 მილიონამდე ლარი, მთის ფონდიდან 700 ათასი და სოფლის განვითარების პროგრამიდან ნახევარი მილიონი ლარი, რაც ეტაპობრივად აისახება ბიუჯეტში.
- ბიუჯეტის დოკუმენტის მიხედვით, საგზაო ინფრასტრუქტურისთვის მილიონ 300 ათასზე მეტის გამოყოფა იგეგმება.
- წყლის და კანალიზაციის მოწესრიგებისთვის მერია 600 ათასამდე ლარის დახარჯვას გეგმავს.
- გარე განათებისთვის მილიონ 200 ათასზე მეტი ლარია გამოყოფილი.
- მშენებლობა-რეაბილიტაციისთვის მილიონ ლარზე მეტი, ქუჩების კეთილმოწყობისთვის და სკვერების გამწვანებისთვის 800 ათას ლარამდეა გათვალისწინებული,
- ხოლო მუნიციპალური ტრანსპორტის სუბსიდირებისთვის – მილიონ ლარამდე.
რაც შეეხება ბორჯომში კოსტავას სახელობის სკვერის და მოედნის რეაბილიტაციას და დასვენების და გართობის ახალი კერების შემქმნას, ბორჯომის მერია ამისათვის 3 მილიონამდე ლარის გამოყოფას გეგმავს.
დასუფთავების მუხლში გაწერილი ინფორმაციის მიხედვით, მერია ამ მიმართულებით მთელი წლის განმავლობაში მილიონ 500 ათასზე მეტი ლარის გამოყოფას გეგმავს. ააიპ “ბორჯომის დასუფთავება და კეთილმოწყობა”-ს მთელი წლის განმავლობაში ევალება, მუნიციპალიტეტის ქალაქების და სოფლების დაგვა-დასუფთავება და ნარჩენების გატანა. ასევე, დაზიანებული ნაგვის ურნების შეკეთება. მრავალსართულიან კორპუსებში სანაგვე ბუნკერის ,მუნიციპალიტეტის ტერიტორიაზე განთავსებული ნაგავშემკრები კონტეინერების დეზინსექციის და დეზინფექციის მომსახურება.
აქვე ნახეთ: 7.5 მილიონ ლარამდე ახალციხეში ინფრასტრუქტურისა და დასუფთავებისთვის — #2022_წლის_ბიუჯეტი
3 მილიონ 500 ათას ლარამდე ადიგენის ინფრასტრუქტურისთვის #2022_წლის_ბიუჯეტი
რა ოდენობის თანხაა განსაზღვრული ინფრასტრუქტურის მოწესრიგებისა და დასუფთავებისთვის რეგიონის სხვა მუნიციპალიტეტებში, თვალი ადევნეთ ჩვენს ვებ გვერდს Toktv.ge, ინფორმაციას ეტაპობრივად შემოგთავაზებთ.